Harrera elkarte asistentziala 2012n jaio zen. "Elkartearen helburua espetxetik edo erbestetik itzultzen diren gizon-emakumeei egoera berrira egokitzeko ahalik eta laguntza handiena ematea da ". Harrera elkarteak, besteak beste, arlo juridiko-administratiboan, osasungintzan, asistentzia ekonomikoan eta lanaren bilaketan laguntza ematen die. "Harreraren beharrak urte hauetan zehar aldatuz joan dira eta horiei aurre egiteko bazkidetza kanpaina egin da Antzuolan. Behar horietaz hitz egiteko eta egungo egoeraren berri emateko hitzaldia antolatu dugu maiatzaren 13rako, osteguna, 18:30ean Torresoroan", kontatu du Ez dot moztuko bizarra taldeak eta hitzaldira joateko deia egin die antzuolarrei. Hizlariak Jon Ugarte eta Josu Amantes preso ohiak eta Harrerako kideak izango dira.