Pandemiak bete-betean kirolaren esparrua jo duen honetan, partidu antolaketa lanak ez dira bat ere errazak izaten ari. Antzuolako lehen taldean, gaur-gaurkoz, ez da positibo kasurik atzeman eta hastear den ligari gogotsu ekiteko prest daude.
Hasiera gorabeheratsua izan dute, eta aurreko asteko lagunartekoa bertan behera geratu zen, Segurako taldean positibo kasu bat antzeman zelako. "Liga hasiko da asteburuan, eta, atsedenaldia tokatzen zaigun arren, lagunartekoa jokatuko dugu, Eibarren. Taldeak hiru astean hobekuntza ona egin du fisikoki, eta gogotsu gaude. Hainbat aldaketarekin hasiko dugu denboraldia: beteranoek utzi egin dute eta jokalari berriak ditugu, bai jubeniletatik igotakoak eta baita Bergaratik etorritakoak ere, besteak beste", azaldu du Iker Epelde entrenatzaileak.
Kadeteen konfinamendua
Kadeteen mailan, aldiz, 23 jokalaritik lauk eman dute positibo eta hiruk konfinatuta segitzen dute (egueneko datuak).
Aldagelen obrak, amaitzeke
Eztalako obren lanak zertxobait atzeratu badira ere, dena ondo bidean azaroan egin gurako luke klubak inaugurazio ekitaldia. "Azaroko lehen asteburuan egin gurako genuke inaugurazioa, baina egunez egun pandemiaren egoerak markatuko du erabaki hori. Udalarekin protokoloa ere zehaztu beharrean gaude: dutxen erabilera, ikusleak egotearen aukera...", azaldu dio GOIENAri Ibon Gezalaga AKEko presidenteak.