Antzuolako Udalak duen zerbitzuetako bat ur-parkea da. Berez ez da igerileku bat, baina aisialdi-instalazio moduan, COVID-19ak eragindako egoera aintzat hartuta, igerilekuek bete behar dituzten baldintza guztiak bete behar ditu. Hori horrela, ur- parkean onartutakoa baino jende gehiago egongo ez dela ziurtatzeko, txandak antolatzea erabaki du Udalak. Bada, horiek modu egokian betetzeko lau pertsona kontratatuko ditu.
Ur-parkea zabaltzen denean, eguneroko lan-jarduna edukiko dute lau zaindariek: astelehenetik domekara, 10:00etatik 20:00etara. Lan egiten duten aste bakoitzeko, beste bat jai hartuko dute. Hau da, 35 orduko jarduna izango dute, bi astetik behin. Interesatuek bete beharreko baldintzak dira: 18 urte beteta izatea eta euskaraz jakitea. Azken hori elkarrizketa bidez ziurtatu beharko da.
Eskaerak hilaren 18a baino lehen entregatu behar dira udal bulegoan edo udala@antzuola.eus atarian.
