Basalde auzoak erdigunearekin lotzeko pasabiderik gabe jarraituko du, oraingoz. Errekalde parean, Deskargatik Bergararako noranzkoan, errepide zati bat hondoratuta zegoen eta Gipuzkoako Diputazioak hasi ditu lurra egonkortzeko eta berdintzeko lanak bertan. Lan horiek aprobetxatuta, Antzuolako Udalak oinezkoendako pasabidea egin zezatela eskatu zion martxoan: "Ura agentziari eta Diputazioari eskatu genien lanok aprobetxatuta errepidea pixka bat zabaltzeko eta oinezkoendako bidea egiteko. Eztabaidatu egin dugu eta, oraingoz, ez daukagu baiezkorik, eta, ikusten denaren arabera, ez dirudi egingo dutenik ere; kudeaketaren ikuspegitik hanka-sartzea dela deritzot. Lan bat hasita dago eta aukera ona dago diru gutxirekin Basalde auzoa herriko erdigunearekin lotzeko. Hala, auzotarrak oinez errepidean ibili beharrean segurtasun osoz ibiliko lirateke pasabidean". Gipuzkoako Diputazioak azaldu du, plataforma zabaltze hori ez dela posible "edozein aukeratan Deskarga ibaiaren jabariaren okupazioa dakarrelako". Gaineratu du, Antzuolako Udalak ibai-jabaria okupatzeko baimena lortuko balu, errepide sailak ez lukeela inolako arazorik jarriko pasabidea egin dadin.