Sailkapeneko beheko aldean zeuden bi talde izanda, Antzuolarentzat eta Oriokorentzat berebiziko garrantzia zuen gaur Eztalan jokatu den partiduan aurkariari gailentzea. Azkenean etxekoak izan dira, 30 minutuan Iker Gardokik sartu duen golari esker, hiru puntuak poltsikoratu eta arnas apur bat irabaztea lortu dutenak.
"Norgehiagoka sufritua izan da. Hasieran urduritasun apur bat egon da, eta behin Gardokik gola sartuta, defendatzea tokatu zaigu. Jakin dugu sufritzen", azaldu du gaur, lesio baten ondorioz, partidua harmailatik ikusi behar izan duen Antzuolako kapitain Ibai Zabalok.
Taldeak erakutsi duen jarrera ona ere azpimarratzeaz gain, aurrera begira ere jarri da: "Datorren astean ere etxean jokatuko dugu, eta gaur ikusi dugun zein den mailari eusteko jarraitu beharreko bidea". Beasain B izango dute datorren astean aurkari.
Oñatiarrentzat ere jardunaldi ona
Aloña Mendik ere gaur jokatu du Erregional Preferente mailako hamabosgarren jardunaldiko partidua, eta 0-2 irabazi oñatiarrek Danenari.