Errekalde auzoan, erreka alboko horma baten egoera txarragatik auzoko errepide zati bat itxi egin du Antzuolako Udalak. "Erortzeko arriskuagatik itxi egin dugu. Bertatik autoak igarotzen dira eta horien pisuagatik erori egin daiteke. Bertako espaloia airean geratu da. Izan ere, alboan erreka dator eta uraren higadurak eraginda horma zatia gastatu egin du urak. Azken asteetako euriek ibaiaren ekarria hazi egin dute eta baliteke horrek ere eragina izatea", azaldu du Antzuolako alkate Beñardo Kortabarriak.
Hala, arazoari irtenbidea eman guran ez ohiko osoko bilkura deitu zuen aurreko astean Udal Gobernuak; hala, aho batez adostu zuen Udal Batzarrak gerakinetik dirua atera eta konponketa lanekin lehenbailehen hastea. "45.000 euroko diru kopurua aterako dugu gerakinetik eta kopuru horrek ahalbidetzen du lanak inolako deialdi librerik egin gabe egin ahal izatea. Helburua da obra azkar egitea eta deialdia eginez gero luze joko luke", argitu du Kortabarriak. Dena ondo bidean, eta lanak berehala hasita, Gabonen atarirako errepide zatia konpontzea espero du Udalak.