Abuztuan herrian geratzen diren antzuolarrendako ezinbesteko festa bilakatu da San Bartolome egunekoa. Hala, abuztuaren 24an, sardina-jan solidarioa egingo dute plazako errekaren alboan, 12:00etan. Herritarren borondatez batzen den dirua Anelkarrek Kongon eta Senegalen dituen hezkuntza proiektuak bultzatzen jarraitzeko izango da. Urtetik urtera goraka doan festa bilakatu da. Orain dela hiru urte 13 kilo sardina erre zituzten; orain bi, 17,5 kilo eta iaz, aldiz, 18 kilo.
Elkartasun Festa
Eta helburu berak lortzeko eta sustatzeko asmoz, Elkartasun Festa egingo du aurten ere Anelkarrek. Abuztuaren 30ean, egubakoitza egingo du –Zurrategi plazan, 19:30ean hasita–. Oporren osteko data esanguratsuena bilakatu da antzuolarrendako eta aurten ere askotariko pintxo eta edariak izango dira protagonista. Eta nola ez, baita ere herritarrek eginiko tortilla solidarioak.