Euskadiko Openerako puntuagarria den DH lasterketa egingo dute zapatuan Antzuolan –entrenamenduak goizean, lasterketa 15:00etan hasita–. Eta bertan, 80 pilotu batuko dira, bizikleta ikusgarriekin: "Antzuolan egingo dugun hirugarren edizioa izango da, eta, egia esan, modalitate ikusgarria da", adierazi du aste barruan Manu Castrok Arrasate Irratian.
Zirkuitua prestatuta dute antzuolarrek, Antigua auzotik gora egiten duen bidetik iristen da bertara, Irimo auzora doan bidetik: "Eta helmuga, berriz, trenbide zaharrean dago". DH jaitsieretan aurrean ibiltzeko zer behar den galdetuta, Castrok garbi du erantzuna: "Kirol modalitate honetan indarra behar da, topera joaten garelako denbora guztian. Eta ibilbidea ondo ezagutu behar da, non dauden harriak, sustraiak, saltoak... Trazaketa oso garbi izan behar da. Pilotuak proba baino lehenago joaten gara zirkuitua ezagutzera".