Ibilbideari dagokionez, lehenengo kilometroak Zubillagara joanetorrian egingo dituzte, eta ondoren, birritan igo beharko dute Deskarga Antzuolatik, itzulia Udanatik eta Oñatitik egin eta gero. Eta tropeleko indartsuenen arteko aukeraketa Asentzioko maldek egingo dute, 100. kilometroan. Ikusteko dago indartsuenen talde hori zenbat ziklistak osatuko duten, garaipena esprintean jokatzeko. Iaz, sei laguneko esprintarekin gozatu ahal izan zuten antzuolarrek, eta Iñigo Elosegi izan zen azkarrena. Xabier Murgiondo oñatiarrak ere protagonismoa izan zuen lasterketan: ihes eginda ibili eta gero, bederatzigarren sailkatu zen helmugan.