Lehen taldeak mailari eustea lortu du denboraldi honetan eta giro ederra izango du kirol elkarte gorriak ekainaren 1ean egingo duten festan. "Mailari eutsita, oso pozik gaude; gainera, iazko denboraldiarekin alderatuta, estutasun gutxiago izan ditugu. Urtea, orokorrean, ona izan da, kategoria batzuetan jokalari kopuruarekin justu samar ibili garen arren", azaldu du AKEko presidente Ibon Gezalagak. Presidenteak gaineratu du AKEko lehen taldeak entrenatzaile berriarekin abiatuko duela denboraldi berria: orain arte gazteen entrenatzaile izan den Iker Epeldek hartuko du Josu Zubikarairen testigua. Ibon Gezalagak aitortu du orain gazte mailako entrenatzailea bilatzeko lanean ari direla.
Egitaraua
Eguerdiko hamabietan, karro-poteoa egingo dute; 14:30ean, herri bazkaria Udal Pilotalekuan –sarrerak agortuta–; 17:00etan, sari banaketa eta aipamen berezia talde bakoitzean gorabehera gutxien izan dituzten jokalariei. Amaitzeko, 18:30ean, Elektro-txufla elektrotxarangaren eskutik dantza egiteko aukera. Antolatzaileek, aurten ere, Baietz Antzuola gorritu! Jantzi denok gorriz! lelopean kamiseta gorria janzteko dei egin diete antzuolar guztiei, festarekin bat egin dezaten.