Atzo arratsaldean botatako euri-jasen ondorioz, Antzuolako herriko hainbat gunetan urak gainezka egin zuen. Kalebarrenen, esaterako, estolderiak gainezka egin zuen. Torresoroa atzealdeko bolatokia ere urez bete zen. "Ura bi gunetik irten zen: AHT ingurutik eta Supide ingurutik. Hilerritik behera ere ura eta lokatza etorri zen. Kalebarrenen estolderia ataskatu zen eta kalea lokaztu zen. Euritea motza izan zen eta estolderia libratu zen. Guk daukagun sentsazioa da segurtasunik ezarena", azaldu du Beñardo Kortabarria alkateak.
Irudi ikusgarrienak, aldiz, GI-2632 errepidean jazo ziren. Errepidea lokatzez eta urez estalita geratu zen-eta. Ondorioz, Ertzaintzak arratsaldeko seiak bueltan errepidea pare bat orduz itxita izan zuen.
Irtenbidea bilatzeko batzarra
Antzuolako udala, autobideko teknikoekin eta ordezkari politikoekin batuko da irtenbidea bilatzeko. "Ura daraman hoditeria ondo aztertzeko eskatuko dugu eta irtenbide bat bilatuko dugu; ez dugu gura eta behin betiko segurtasun ezean bizitzea ", gaineratu du alkateak. Azpiegitura departamentuak jakinarazi du hoditeria guztiaren gainbegiraketa egingo dutela eta azaldu dute "AHTko lanek eragin izan dutela antza".