Herriko merkatariek lehen hitza, euskaraz

Maider Arregi 2018ko urr. 31a, 12:43

Pixkanaka zabalduz doa Euskaraldiarekiko kontzientziazioa herrian. Antzuolako hainbat talde eta eragilek atxikimendua adierazteko argazkia ere atera dute. Izena emateko aukera eguen iluntzero erdigunean jartzen duten postuan dute herritarrek.

Herriko merkatariek garbi dute azaroaren 23tik abenduaren 3ra bitartean antzuolar guztiak inplikatu gura dituztela Euskaraldiarekin. Hala, herritarrak motibatzeko asmoz, lehen hitza euskaraz egingo dutela azpimarratu dute. "Maiz, aurreiritziekin jokatzen dugu eta gaztelerara errazegi jotzen dugu. Ondoren etortzen zaizkigu sorpresak. Izan ere, askok dakite euskaraz, eta guk lehen hitza euskaraz eginda ohitura horiek aldatu egin behar ditugu", dio Xinkonako Alaitz Jauregik; merkatariek ez ezik, Debagoieneko enpresa ugarik langileak kontzientziatu gura dituzte Euskaraldiarekin: "Belarri eta aho formako 11.000 kilo pasatxo gozoki eskatu dizkidate, lantokietan banatzeko eta gaiaz langileekin jarduteko".

Klikatu dendako Amaia Madariaga, berriz, mintzalaguna da. Euskaraldiaz harago, euskararekiko konpromisoa egunero bermatu gura du: "Urte osoan saiatzen naiz lehen hitza euskaraz egiten. Dendarekin lotutako hitz asko teknikoak eta arrotzak dira; baina bezeroek ikasi eta erabili egiten dute".

Gurasoak ere, Euskaraldiarekin bat

Pausoka Guraso Elkarteak urteko batzar orokorra egin zuen urriaren 24an. Bertan, Euskaraldia aurkeztu zuten eta Euskaraldiarekin bat egiten dutela adierazteko talde argazkia atera zuten batzordea osatzen duten kideek eta bertaratutako gurasoek.
Izena emateko orria eta informazioa guraso guztiei banatuko dizkie Herri Eskolak.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak