Antzuolarrei esker 1.100 euro lortu ditu Anelkarrek Kongorako eta Senegalerako

Azaroaren 10ean 20 urte beteko dituen Antzuolako Anelkar elkarteak urteroko Elkartasun Festa antolatu zuen atzo, egubakoitza. 1.100 euro lortu zituzten: "Giro ederra izan genuen. Herritarrek dagoeneko ezagutzen gaitu, badaki nora doan dirua eta ederto erantzuten dute", dio Anelkarreko Kontxi Laskurainek. Dirua Kongoko eta Senegalgo proiektuetara bideratzen da, bereziki eskolen egoera hobetzera.

Badira sei edo zazpi urte Elkartasun Festa oporren osteko lehen egubakoitzean egiten dutela –aspaldi azaroan egiten zuten– eta atzokoan ere primeran joan zen festa. Herritarrei tortillak eramatek eskatu eta 50 tortillatik gora izan zituzten. "Gaur egun mugikorretik gogorarazten dugu tortillak ekartzearena eta urtez urte jendeak hobeto erantzuten du. Eskertzekoa da", uste du Laskurainek.

Kongoko proiektuarekin dihardu Bittor Arbuluk eta Senegalera, berriz, Kristina Bakaikoa joaten da urtero. "Biak dira antzuolarrak eta horregatik ere jendea asko inplikatzen da. Badakite batzen den dirua joan behar den lekura joango dela". Atzo 1.100 euro lortu zituzten eta uda aurretik egin zuten sardina-janean 650 euro inguru batu zituzten. "Oso kopuru polita da, herritarrei eskertzekoa".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.