San Isidro jaia giro onean ospatzen ari dira antzuolarrak, Aiherrakoekin batera

Ganadu feria eta barazki zein artisau postuak izan dira Kalebarrenen eta Herriko Plazan goizetik. San Isidro egunaz gain, Aiherra-Antzuola senidetze eguna ere ari dira ospatzen eta aurten 24 lagun etorri dira Aiherratik. Bestetik, emakumezkoek lehen aldiz parte hartu duten behi-jezte desafioan; Arrasateko Eli Garai eta Enrike Pagoaga izan dira irabazle.

Festa giroan esnatu dira gaur Antzuolako kaleak, San Isidro eguna ospatzeko. Ohi moduan, ganadu feria ikusgai izan da eta barazki zein artisau postuak ere izan dira bertaratu direnen gozamenerako. Eguraldi onarekin, eguerdi partean, Antzuolako erdigunea jende ugariz bete da.

Aiherrakoak ere bai

San Isidro festarekin batera, aurten 34. urtez ospatu dute Aiherra-Antzuola senidetze eguna, eta guztira 24 lagun etorri dira Aiherratik. Beste urte batzuetan baino gutxiago, izan ere, Aiherra inguruetan ere jaiak dira egunotan, baina etorri direnak gogotsu iritsi dira herrira, jaiaz gozatzera.

Behi-jezten, emakumezkoak

Jaime eta Garazi Larrea aita-alaba antzuolarrak eta Enrike Pagoaga eta Eli Garai arrasatearrek hartu dute parte aurtengo behi-jezte desafioan. Zurrategi plaza jendez bete da, txalo artean, aurten estreinakoz emakumeek parte hartu duten desafioan animoak emateko asmoz. 5 litro jaitsi dituzten arrasatearrak izan dira garaile, baina Larrea aita-alabak ere lan ona egin dute 4,5 litro esne jaisten.

Desafioan, Balentin Agirre Urruti izan dute gogoan eta harendako txalo zaparrada ere izan da.

Kukumarro lehiaketa

Beste urte batez, kukumarro edo txorimalo lehiaketa ere egin dute, eta talde parte-hartzaile bakarra egon da; herriko jubilatuek egindako kukumarroa aurkeztu dute, eta 90 euroko saria eskuratu dute.

 

 

 

 

Erlazionatuak

San Isidro jaiko argazkiak

Antzuola

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.