Pablo Rodriguez kantabriarrak irabazi du Uzarragako igoera

Mireia Bikuña 2018ko mar. 24a, 19:55

Azken bi kilometroetan erabaki da lasterketa. Uzarragako azken igoeran ziklista bakoitzak bere erritmoa ipini du eta pedal kolpe azkarrena Isidoro San Justo taldeko ziklistarendako izan da. Ziklista berak irabazi du mendiko saria.

Lehen kilometrotik euriarekin borroka egin behar izan dute gazte mailako ziklistak. 67 kilometro gogor izan dituzte aurretik. Lehen zatian Oñatiraino joan dira eta Zubillaga auzoan buelta egin eta Antzuolarako noranzkoa hartu dute. Deskarga igo eta Udanatik behera, Oñati pasa eta Bergaratik, Antzuolara joan dira berriro. Lehenengo sarreran, Uzarragako bidegurutzea hartu eta hor hasi da benetako lehia. Bi kilometro gogor horietan erakutsi dute Isidoro San Justo taldeko ziklistek eurek zirela indartsuena. Guztien gainetik, Rodriguez gailendu da.

Lehen hamarren artean lau txirrindulari sailkatu direnez, Kantabriako Isidoro San Justo taldeak irabazi du talde onenaren saria.

Antzuolar onena

Haren atzetik gainerako ziklistak. Banaka-banaka. Neke aurpegiarekin. Eta, zortzigarren lekuan, Iñigo Aranburu antzuolarra. "Hoztuta eta nekatuta heldu naiz. Deskargako igoeran gehiagi eman dut eta hustuta heldu naiz Uzarragara. Onerako eta txarrerako oso ondo ezagutzen dut igoera hau eta banekien sufritu egingo nuela", esan du bukaeran.

 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak