Ione Larrañaga ilustratzaile gaztea (24 urte) eskarmentua daukan artista da. 15 urterekin Olaran etxean, lehenengoz, hainbat margolan ardatz ziren erakusketa zabaldu zuen. "Hasieran, pintura lanak egiten nituen. Arte Ederrak ikasi nituen, eta orain, Ilustrazio ikasketak egin ditut. Pintura eta ilustrazioa uztartzen duten lanak egiten ditut orain. Hain zuzen ere, lan horiek dira Aitz Garbin jarri ditudanak", kontatu du Bartzelonan bizi den artistak.
Martxora arte
Erakusketa hilabete hasieran zabaldu zuten eta oso harrera ona izaten ari dela dio Larrañagak: "Lanen bat ere saldu da, eta jendearen artean mintzagai da erakusketa. Oso pozik nago, harrera ona izaten ari da eta". Surrealismo kutsuko lan sorta martxoa erdira arte bisitatzeko aukera egongo da. "Herriko jendea, lagunak eta familiakoen argazkiak ilustratzen ditut. Izan ere, ikusleei gustatu egiten zaie eta errekonozitzeko, gainera, errazagoa dela uste dut".