Bihar hasiko da Antzuolako Mus Txapelketa

Iazko txapelketako irabazleak, Josu Zubikarai eta Josu Asensio.

Lau kanporaketa egongo dira, eta finala urtarrilaren 28an jokatuko da. Parte hartzeko, bikoteko kideetako bat gutxienez antzuoalarra izan behar da, eta 20 euro ordaindu behar dira izena emateko.

Lau kanporaketaz eta finalaz osatutako egongo da aurten Antzuolako Mus Txapelketa, eta bihar arratsaldean jarriko da martxan, 16:30an Mox tabernan egingo den lehen kanporaketarekin. Urtarrilaren 12an izango da bigarrena –22:30ean, Gailur tabernan–; hirugarrena, urtarrilaren 20an –16:00etan Ongietorri jatetxean–; eta laugarrena eta azkena, urtarrilaren 21ean ­–16:30ean, Eperra elkartean–.

Parte hartzeko, bikoteek jokatu nahi duten lekuan eman beharko dute izena, eta 20 euro ordaindu.  Antolatzaileek adierazi dutenez antzuolarrek bakarrik ez, herrikoen senideek edo Antzuolan lan egiten duten kanpotarrek ere hartu dezakete parte txapelketan, baina bikoteko antzuolar bat behintzat egon beharko da. Bikote bakoitzak kanporaketa bakarra jokatu ahalko du, eta kanporaketa egiteko, gutxienez lau bikotek eman beharko dute izena.

Finala urtarrilaren 28an jokatuko da, 16:30ean, Arin jatetxean. Bertan esango da zein antzuolarrek hartuko duen parte Euskal Herriko Mus Txapelketako Gipuzkoako kanporaketan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.