Bertsolariek eta trikitilariek girotutako luntxa izan dute gozagai bertaraturikoek; bitartean, egitasmoaren bultzatzaileek esku orri bidez zabaldu dute mahai-inguru sortari buruzko informazioa. Jende asko erakarri du hitzorduak.
Mahai-inguruak, abenduan hasita
Zergatik euskaraz? galdera izango dute oinarrian mahai-inguruek. Zehatz esanda, hilabete honetan egingo dute lehen saioa –abenduaren 12an–, eta datorren urteko abendura arte luzatuko da egitasmoa; herriko enpresen bueltako gonbidatuak izango dituzte egun horretan.
“Goizperko, Matz-Errekako eta Elayko esperientzia ekarriko dugu mahaiaren bueltara. Besteak beste, horietan garatutako euskara planak izaniko eragina landuko dugu”, azaldu du Euskara zinegotzi Jon Ugarteburuk. Hala, gizarteko alor ezberdineko jendea bildu gura dute berbaldietan.
Urtaro bakoitzean saio bat eskaini gura dute bultzatzaileek; beraz, guztira, bost lirateke eskainiko lituzketen saioak. Horietan, enpresaren bueltakoek ez ezik, musikariek, euskararen aldeko apustua egin duten atzerritarrek, antzerki munduko pertsonek eta komunikabideetako kideek ere esku hartuko lukete. Gaur-gaurkoz, zehaztu gabe dituzte hurrengo hitzorduak.
Argazkiak: Jabier Etxaniz
