Azkarate aldetik ilunabarra da epaimahaiaren ustez aurkeztu diren lanen artean ederrena. Pablo Bonillaren erretratua da. Lehen aldiz eskuratu du gainera sari nagusia (200 euro). Bigarren saria Sergio Morenok eskuratu du Colorado Ibaia argazkiari esker (150 euro). 19 urtetik gorakoen maila honetan 21 lan aurkeztu dira.
Gazteen mailan (13-18 urte), saria Uxue Iparragirreren Jokulsarlon lanak jaso du (45 euro). Iparragirrek ere lehen aldiz irabazi du herriko argazki lehiaketa. Bigarren saria, ordea, hutsik, banatu gabe ustea erabaki du epaimahaiak (hiru lan aurkeztu dira soilik). Aipatu ere haurren mailan inor ez dela aurkeztu.
"Orain arteko parte-hartze txikiena izan du edizio honek. Baloratu beharko dugu zer gertatu den, baina hausnarketa egin beharrean gaude. Besteetan baino jende gutxiago aurkeztu da-eta. Datorren urterako zerbait aldatzea planteatu beharko genukeela uste dugu. Gaur egun hain erraz ateratzen ditugu argazkiak smartphone-ak direla... izan ere, kamara beti aldean daramagu. Eta noski, ume zein gazte jendea ez aurkeztu izanak zer pentsatua eman digu. Horiek erakartzeko lehiaketaren orain arteko formatua aldatzea ere komenigarria dela uste dugu. Hala, teknologia eta aplikazio berriekin ateratako edo tratatutako formatu desberdineko lanak aurkezteko atal bat sortzea ere komenigarria dela uste dugu", azaldu du Kultura teknikari Jone Larrañagak. Epaimahai lanetan Juanje Amasorrain eta Mari Paz Ugalde adituak ibili dira.
Erakusketa bihar
Eta urtero legez, argazki lehiaketara aurkeztutako lanak, herritarren aurrean erakusgai jarriko dituzte datozen bi asteburutan Olaran etxean.
Hala, azaroaren 26 eta 27an, 18:30etik 20:30era bitartean Olaranen izango dira herritarren lanok ikusgai; guztira, 24 erretratu eder. Abenduko lehen asteburuan ere erakusketa bisitatzeko aukera izango dute antzuolarrek: abenduaren 3an eta 4an.