Futbol eskola sortzea izango da Antzuola Kirol Elkartearen erronketako bat

Mikel Kerexeta presidentea eta Izaskun Larrañaka idazkaria, batzarrean.

Urteko batzarra egin zuen Antzuola Kirol Elkarteak atzo, egubakoitza. Zuzendaritzak zorrik gabeko kontuak aurkeztu zituen, eta kirol arloan futbol hastapeneko eskola abian jartzea izango da erronka. Albiste txarra, aste barruan aurreratu moduan emakumezko talde barik geratuko direla antzuolarrak. 

Gizonezkoen taldeari dagokionez, Antzuolak lau talde izango ditu Estalan lehian, eta talde nagusiak kategoria galdu ostean beheragoko mailan ondo lehiatu ahal izateko taldea sortzea izango du helburu, eta badabiltza horretan. Klubaren erronka handia, berriz, harrobian egongo da, futbol hastapeneko eskola abian jarriko dute-eta: "Alde horretatik, eskerrak eman gura dizkiogu Matz-erreka enpresari, ekonomikoki eurei esker izango delako posible futbol eskola martxan jartzea. Eta bestetik, eskerrak Goizperri ere, urtero ematen diguten diru-laguntzarekin batera klubean izan ditugun lapurreten ondorioz jaso dugun laguntzagatik. Lapurrek desfribiladorea eta bestelakoak eraman zituzten, eta Goizper egin da horren kargu", adierazi du Mikel Kerexetak.

 Zuzendaritzan aurpegi berriak

Horrekin batera, Kerexetak azaldu du zuzendaritza taldea berriztea ere tokatzen zela, eta Miren Karmele, Ander Murgiondo eta Ibon Gesala izango dira kide berriak, oraindik karguak zehaztu ez badituzte ere.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.