Mendizabalek galdu egin du sanferminetako lau t'erdiko partidua: 14-22

Arrasateko Uarkape pilotalekuan jokatu du Jon Jaunarenaren kontra. Hainbat alditan berdinketa eskutan izan duen arren, urduri jokatu du eta akatsak egin. Ez du aukerarik izan lehia irabazteko. "Jaunarenari erraztasunak eman dizkiot, eta ez du barkatu. Ni baino gehiago izan da", esan du antzuolarrak.

Bigarren mailako txapela jantzi ostean, lau t'erdikoan lehiatu da Antzuolako pilotaria. Sanferminetako txapelketako partidua izan da. Mendizabalek izan du lehen sakea, baina tantoa Jaunarenaren aldekoa izan da. 6-1  eta 8-3 aurreratu da Leitzako pilotaria. Antzuolarra urduri egon da kantxan eta hainbat akats egin ditu, baina ez dio neurria galdu lehiari. 9-8 hurbildu da markagailuan eta berdinketarako pilotakada izan du, baina, dejada, kanpora bota du.

Horren ostean, Jaunarenak tartea zabaldu du berriro ere (12-9) eta berriro hurbildu zaio Mendizabal (12-11 eta 15-13). Orduan ere ezin izan du berdinketa lortu. Horren ostean, sei tanto segidan egin ditu leitzarrak eta lehia erabakita utzi du.

Rezustak ere galdu

Sanjuanetako pilota jaialdiko bigarren partiduan Altuna III-Badiola eta Ezkurdia-Rezusta lehiatu dira. Partidua oso parekatua izan da eta bikote urdinak irabazi du, 18-22.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.