"Antiguatik plazaraino jaitsiko gara. Bertan, Errukizko Gure Amaren Eliza ikusiko dugu eta herriko zenbait istorio kontatuko ditut", dio Lide Valverdek.
Antiguako ermita
XIV. mendekoa da Antiguako baseliza. "Barrualdean dagoen Andre Mari gotikoa bisitatuko dugu; izan ere, historiaren gakoetako bat da", azaldu du Valverdek.
Antzuolako erdigunea
Kalegoitik behera jaitsiz, plazarainoko ibilbidean hainbat altxorrekin topo egingo dute. Hala, Kalegoiko Txasionekoaz (garai bateko harategiaz) eta Montxonenekoaz (errekarri ikusgarria du) berba egingo dute. Herriguneko eraikin zaharrena, Txasiozarrenekoa, (XV-XVI. mendekoa) ere bisitatuko dute.
"Herriko Plazaren estilo barrokoa kanpotik ikusiko dugu". Martin de Carrerak XVIII. mendean egindakoa da. Udaletxearen bi aldetan daude gainera estilo barrokoa duten Bizkalatzako etxea eta Goenaga etxea. Aipagai izango dute ere erdigunetik eta plazatik ikusten den Kanpai dorrea eta eliza. 1866an eraiki zen kanpai dorrea eta 1952an oinaztarri batek jo eta su hartu zuen.
Izena emateko Debagoieneko mankomunitatera deitu: 943 79 64 63.