Euskadi Lagunkoia Eusko Jaurlaritzak eta Osasunaren Mundu Erakundeak bultzatutako proiektua da. Otsailaren 17ko osoko bilkuran onartu zen egitasmoarekin bat egitea, eta orduz geroztik, nagusiki erretiratuak diren pertsona talde bat martxan dago.
Diagnostikoa eta lagunkoitasun plana osatu behar dute proiektuaren lehen fasean. Honen baitan, zortzi arlo desberdin jorratuko dituzte. Haietako bost landu dituzte jada. Lehenengo, aire zabaleko lekuak aztertu dituzte, herria adinduentzat zein puntutaraino prestatuta dagoen ikusi eta hobekuntzak proposatzeko.
Etxebizitzaren gaiari ere heldu diote eta etxebizitzetan igogailua jartzeko dauden diru laguntzak aztertu dituzte. Baita garraioarena ere.
Parte-hartzea sustatu eta herritar sarea sortzea ere bada Herri Lagunkoia proiektuaren helburua. Besteak beste, kanpotarrekin lan egiten duen Auzoko taldearekin harremanetan ari dira.
Orain arte landuriko azken puntua enplegua izan da. Honen harira, "oso ondo prestatuta" dauden herriko gazteak aintzat hartzeko eskatu dute.
Hau guztia jorratzeko bilera ugari egin dituzte otsailetik hona. Hala irailean egingo den udal batzarrean, jasotako akta jakinaraziko dute. Herritarrek Antzuolaren gainean egin duten inkestaren balorazioa ere jakinaraziko dute.