"Pareko bi eskaintza genituen baina Etxaidek puntuazioa altuago dauka; prezioan ere oso alde txikia dute, Etxaide merkeagoa da eta gainera hamar urteko bermea duen igogailua eskaintzen du”, azaldu du Beñardo Kortabarria alkateak.
Lehen fase honetan, udaletxeko sarrerako arrapala eta igogailua egingo dira. 109.626 euroko kostua izango dute lanek. Asmoa irailaren erdialdean lanekin hastea dela dio alkateak. "Bi hilabeteko epean egin gura dira lanak eta urtea bukatzerako igogailua jarrita egotea. Irisgarritasun lanen lehen fasean, 'L' formako arrapala jarriko da kanpotik udaletxe barrura sartu ahal izateko. Igogailua, aldiz, Korreoseko buzoiak dauden tokian jarriko da eta goraino igoko da. Buzoiak kendu eta beste toki batean jarriko ditugu", azaldu du.
Bigarren fasea zehaztu eta diseinatu gabe dago. Baina, asmoa da beheko solairuan harrera eta bulegoak behera ekartzea. Goian bulego teknikoak eta alkatetza jartzea dela asmoa kontatu du Kortabarriak. Guztia baina, zehazteke dago oraindik.