Ipuin eta bertso maratoia egingo da domekan

 Domekan, bigarrenez, Ahotik Bihotzera ipuin eta bertso maratoia ospatuko da. "Aurten jende gehiago espero dugu; dagoeneko 34 lagunek azaldu dute interesa. Antzuolarrak dira batzuk; asko, ordea, ipuinak maite dituzten debagoiendarrak", azaldu du Virginia Imaz antolatzaileak eta Oihulari Klown taldeko kideak. 

Domekan eguerdian hasiko da festa. 12:00etan ipuin-bertso poteoa egingo dute tabernaz taberna. "Ahozko tradizioa galtzeak pena ematen digu. Gure aitona-amonen  istorioak eta kontuak mantentzen saiatu behar dugu; liburutegi handi bat dira gure nagusiak". 17:00etan hasiko da Torresoroan ipuin eta bertso maratoia. Gaztetxoak zein helduek parte hartuko dute. Aurrena ipuinak kontatuko dituzte eta ondoren  inprobisazioaren txanda izango da, bertsolariek bat-batekoan ipuin horien gaineko bertsoak bota beharko dituzte-eta. "Beste hizkuntza batzuetan, itzulpenekin, ere entzungo dira ipuinak. Ohitura eta erreferente bilakatzea gura dugu eta urtero aurrera egin dezan eta zabal dadin", dio.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.