Infantiletatik jubeniletara bitartean Urolan aritu zen Iñaki Agirre. "Antzuolan ez zegoen talderik eta horregatik joan nintzen Urolara. Jubeniletatik berriro Antzuolara etorri nintzen lagunekin batera aritzeko". Futbolak asko eman diola dio. "Futbolak eman didan handiena lagunak dira. Zaila da errotik moztea futbolarekin dudan harremana, eta horregatik, tarteka entrenatzera ere joango naiz Eztalara", gaineratu du.
Baja garrantzitsuak
Baina, Agirre ez da taldea utzi duen jokalari bakarra. Josu Zubikarai eta Josu Asensio beteranoek ere agur esan diote taldeari. Aipatu ere, Jon Iturbek Beasainen jokatuko duela aurrerantzean. "Atezain gaztea da Iturbe eta aukerak ditu. 22 urte ditu eta ea han ikasteko aukera daukan".
Antzuolarendako baja garrantzitsuak diren arren, taldea ondo ikusten du Agirrek datorren denboraldiari begira.
Murua eta Garinen aginduetara
Jon Muruak eta Ekain Garinek hartuko dute Antzuolaren gidaritza aurrerantzean. Ilusioz eta gogotsu daude arrasatearrak. Jokalariak oso gustura daude eta harrera bikaina egin die bi entrenatzaileei. "Dagoeneko entrenamenduak egin dituzte Murua eta Garinekin. Herriko jaien aurretik egin zuten lehena. Ziur nago ondo egingo dituztela lanak".
Bai Murua eta baita Garin ere, eskarmentudun jokalariak dira. Gainera, Mondran entrenamendu saio dezente egindakoak dira biak. Oraindik fitxaketak zabalik daudela dio Agirrek. "Urtea luzea egiten da eta jokalari beharra dago; oraindik ez dago taldea osatua; kapitaina zein izango den ere ez dago erabakita", dio.