Herri bazkarirako eta erretiratuen afarirako txartelak salgai daude

Inauteriak iristear dira eta poliki-poliki egun berezi horietara zuzendutako ekintzen berri izaten ari gara. Oraingoz, herri bazkariaren gaineko informazioa dago eskuragai. Izan ere, martxoaren 2an izango den herri bazkarirako txartelak dagoeneko salgai daude, otsailaren 26ra arte, hain zuzen ere.

Ohikoa denez, dantzariak 10:00etan hasiko dira kaleak alaitzen, tximinoa, hartza eta hezitzailea lagun dituztela, eta 14:30ean izango da herri bazkaria. Helduendako eta umeendako menuak egongo dira. Txartelak gaztetxean, udaletxean eta liburutegian daude salgai, otsailaren 26ra arte; hau da, eguaztenera arte. Prezioei dagokienez, helduek 13,5 euro ordaindu beharko dituzte eta haurrek, 10 euro.

Erretiratuen afaria

Inauterietako martitzenean, hau da, martxoaren 4an, afaria egingo dute erretiratuek. Bada, afaltzera joan nahi dutenek izena eman beharko dute datorren astean, hilaren 25ean edo 26an, erretiratuen bulegoan, 16:00etatik 18:00etara. 4 euro ordaindu behar da. Aurten, baina, afariaren ondoren kinan jokatu beharrean dantzaldia egongo dela jakinarazi dute erretiratuen elkartetik. Eta, iaz bezala, afarira mozorrotuta joateko dei egin dute.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.