Gure Esku Dago

Antzuolan ere 'Gure esku dago' dinamikaren baitako taldea sortu guran dabiltza

Erabakitzeko eskubidearen aldeko 'Gure esku dago' dinamikaren barruko taldea sortu gura dute Antzuolan ere, eta dinamikaren jendaurreko aurkezpena egin zuten atzo Olaranen.

Goierrin jaio zen Gure esku dago dinamika, eta bi goierritarrek egin zuten Antzuolan beronen aurkezpen orokorra: Aloña Galarragak eta Mikel Egigurenek. Helburua eta orain arte egindakoak azaldu zituzten, eta besteak beste, erabakitzeko eskubidea prepolitikoa dela esan zuten: "Hemen ez bezala, beste herrialde askotan autodeterminazioa eskubide moduan hartzen dute alderdi abertzale eta ez abertzaleek. Guk eskatzen dugu eskubide hori lortzeko bidea batera egitea; gero bakoitzak erabakiko du nahiago duena: independentzia, oraingo egoera... Ideologiaz gaindi dagoen zerbait da, oinarrizko eskubidea".

Giza katea, Antzuolatik

Jon Ugarteburu da taldea sortu guran dabilen antzuolarretako bat: "Hiruzpalau pertsona ari gara horretan, eta esparru ezberdinetako jende gehiago erakarri nahi dugu taldea eratzeko".

Gure esku dago-k giza katea antolatu du ekainaren 8rako, eta Antzuolatik pasako da berau. Ugarteburuk azaldu zuen asmoa dela Antzuolak kilometro bat hartzea bere kargu: "Kalkulatzen dugu kilometroa osatzeko 400 pertsona behar direla, eta hori da gure helburua". Egun hori jendea motibatzeko erronka moduan hartu eta talde iraunkorra sortu nahi dutela gaineratu zuen Ugarteburuk.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.