Autobusek herri barrutik igaro beharrik ez izateko asmoz egin dute Sagastiko biribilgunea eta ondorioz, orain arte Olaran etxearen ondoan egon den geralekua gune horretarako lekualdatuko dute. Astelehenetik aurrera, beraz, biribilgune parekoa izango da geraleku bakarra, norabidea edozein dela ere.
Zumarragatik Bergarara doazen autobusak Sagastiko sarbidetik sartuko dira eta biribilgunean buelta eman ostean, geldialdia egin eta herritik irtengo da berriro. Bergaratik Zumarragara doazen autobusak, Sagastiko sarbidetik sartuko dira eta biribilgunea aprobetxatuta, beherantz joango dira. Eskola ondotik Buztinzuritik gora egin eta Antiguako bidegurutzetik irtengo dira.
Utzitako lursailak
Udal korporazioak jakinarazi duenez, "zenbait herritarrek euren lursailak utzi dituztelako izan da posible obra hau egitea". Eta Kontxi Agirreurreta, Ormazabal familia eta Ortuibar eraikuntza enpresari esker-ona adierazteko asmoz, eurekin elkartuko da Inma Beristain alkatea obra erakusteko. Bihar izango da hitzordua, 12:00etan.
