Joanjo Arrieta bildumagile segurarraren ia 300 pegatina daude ikusgai gaztetxean. Denetariko gaiak jorratzen dituzte pegatina horiek: politika, sexualitatea, emakumeen askatasuna, umorea...
Bigarren autodefentsa tailerra egingo dute bihar gaztetxean bertan. Goizean izango da, 09:30etik 13:30era eta bertan parte hartzen duten emakumeek euren kezkez hitz egiteko eremu bihurtuko da gaztetxea.
Kontzentrazioa astelehenean
Emakumeenganako Indarkeriaren aurkako Nazioarteko Egunean kontzentrazioa egingo dute Herriko plazan, Udalak deituta. Erasorik ez leloarekin batuko dira 19:00etatik aurrera indarkeriarekin amaitzeko beharraz ohartarazteko. Herritarrei bertan parte hartzeko deia luzatu zaie.
Azaroaren 25eko ekintzekin amaitzeko, maskulinotasun tailerra egingo dute azaroaren 30ean. Emakumeei umetatik emakume izaten erakusten zaien moduan, gizonezkoei gizon izaten erakusten zaie eta euren jarrera, balio eta jokabide askok heziketa honekin du zerikusia. Eurendako ezarritako eredu horrekin eroso sentitzen diren aztertuko dute. Izena emateko udaletxera joan edo 943 76 62 46 telefonora deitu behar da.