Zenbait zerga eta tasa bere horretan mantenduko dira, ekonomi jardueren eta eraikuntza, instalazio eta obren gaineko zergak, adibidez. Beste hainbatek, berriz, %1eko igoera izango dute; hauen artean ondasun higiezinen, trakzio mekanikoko ibilgailuen eta hirilurren balioen gehikuntzaren gaineko zergak. Etxe hutsen gaineko errekargoa %100ean mantenduko da 2014ean.
Ur hornidura zerbitzua eta estolderia zerbitzua Gipuzkoako Ur Kontsorzioaren esku utzita ditu Udalak eta hitzarmenak iraun bitartean Udalak ez du hauen inguruko erabakirik hartu beharrik. Horren harira, EAJk kexa agertu zuen atzoko osoko bilkuran, "ordenantza fiskalen proposamenean ez delako jasotzen zein aldaketa jasango duten tasa horiek". Beste herri batzuetan kopuruak dagoeneko ezagutzen dituztela gaineratu zuen Maria Eugenia Arrizabalagak.
Mozioak
Hiru mozio aurkeztu zituen udal gobernuak atzoko osoko bilkuran: Fagor Etxetresnak enpresako langileei eta kooperatibistei elkartasun adierazpena, epaiketa politikoen aurkako mozioa eta azaroaren 25aren harira, emakumeenganako indarkeria salatu eta honen aurka aritzeko Udalaren konpromisoa adierazten duena. Hiru mozioak onartu ziren.