Hasiera batean, hamazortzi pertsona ziren joatekoak baina, azken orduan batutakoekin, 21 pertsona joan ziren. 06:30ean irten ziren Antzuolatik eta 12.00etan ekin zioten lehen maldak igotzeari. Eguraldia lagun, erritmo dotorean egin zituzten lehen hiru orduak, Ordesako begiratoki ederrera iritsi ziren arte. Bertan baina, eguraldia aldatu, eta txingor artean egin behar izan zuten Gorizko aterpetxeraino gelditzen zitzaien ibilbidea.
Bigarren egunean, berriz, 08:00etan abiatu ziren 21 kideak, eguraldi ederrarekin eta giro alaian, ostera ere. Lehen geralekua Casteretsgo Gruta Helada izan zuten; kranpoien erabilera beharrezkoa izan zuten bertan, kobazuloan sartu eta izotz bloke dotoreak ikusteko. Kobazulotik irten eta maldan gora jarraituz, Errolanen Arrailera iritsi ziren, eta handik, batzuk beheranzko bidea hartu zuten; besteek aldiz, motxilak bertan utzi, eta Taillon mendia igotzeko parada izan zuten. Pirinioek eskaintzen dituzten bista zoragarriak ikusi ostean, beheranzko bidea hartu zuten, eta Sarradetseko aterpetxean bazkaldu zuten.
Bazkal ostean, aurreko eguneko bustia ahaztu gabe, hodeiak ikusi eta ziztu bizian egin zuten Puerto Bujaruelorako (Gavarnie) bidea. Autobusak bertan hartu zituen eta, bidaia amaigabe baten ostean, 23.00ak inguruan iritsi ziren Antzuolara.
Elkarteko kideek, bidaiaren balorazio positiboa egin dute, eta datorren urterako ibilbidea pentsatzen hasi dira jada.