Aurreikusitakoaren arabera, hurrengo ikasturtean haurrendako ikastaroak bakarrik eskainiko ditu.
Izena emateko datorren astelehenetik ostiralera Xinkona dendara joan behar da. "Ilarak sortu ohi dira eta astelehenean denbora gehiago egongo naiz", adierazi du. Beraz, astelehenean 16:00etatik 20:00etara egin daiteke izen-ematea eta asteartetik ostiralera, berriz, 17:00etatik 20:00etara. Prezioa 40 eurokoa da.
Ikastaroetan landu beharrekoa adinaren arabera zehazten du Jauregik. Txikienek josten ikasten dute eta zaharragoek puntua eta kakorratza egiten. "Irailean hasten da ikastaroa eta negua hurbil dagoenez, ongi etortzen zaie horiek ikastea, bufandak egin ditzaketelako, adibidez". Diru-zorroak eta antzekoak ere egiten dituzte. Materialei dagokionez, egunerokotasunean eskura dituzten gauzak erabiltzen saiatzen dira.
Bestelako heziketa
Eskolaz kanpoko jarduera ohikoenak kirolak eta hizkuntzak diren garaiotan, Jauregiri ez zaio ikaslerik falta bere ikastaroetan. Aurten 80 ume inguru izan ditu, bizpahiru taldetan banatuta. Gainera, haur batzuk kanpoan geratu dira, ez zegoelako lekurik.
Saioetan eskulanak egiten ikasten dute baina bestelako heziketa ere jasotzen dute: "Arrain batzuk ditugu dendan eta haiei jaten ematen diete, ardurak hartzeko", azaldu du Jauregik. Gainera, kaleko iturritik ura hartzen dute, iturrikoa edaten ikasteko.