Antzuolan Anelkar elkarteak antolatutako elkartasun festak arrakasta izan zuen eta eginiko afarira herritar ugari bertaratu ziren, 80 inguru. Osteko dantzaldira, gainera, beste hainbat lagun ere bertaratu ziren.
Modu horretan, 100 pertsona inguruk egin zuen bat festarekin: "Nabarmentzekoa izan da jubilatuen eta gaztetxekoen parte hartzea. Denetarik egon da eta txalotzeko zein zoriontzeko modukoa izan da". Hala azaldu du elkarteko kide Jabier Etxanizek. Pozik agertu da emaitzarekin: "Eguraldiak ez digu asko lagundu eta ipar haizea gurekin egon da afari guztian, dantzan hobeto ibili gara". Izan ere, afalostean, Patxi Monteroren laguntzarekin ordu eta erdiz gorputza mugituta freskurak kentzeko erremedio bikaina aurkitu zuten.
Bereziki eskertu gura izan dute Patxi Montero antolatzaileek: "Jendeari asko gustatu zaio eta giroa alaitu du".