Eredu aldaketa beharrezkoa da krisitik irteteko eta herritarrak daude horren erdigunean, ahaldun nagusiaren esanetan: "Krisia sistemikoa, egiturazkoa eta askotarikoa da, eta orain arteko errezetek ez dute balio. Egoera honetaraino ekarri gaituzten politikak aldatu behar dira, beste eredu bat bultzatu behar dugu, eredu partekatu bat, elkarlanean, gipuzkoarron artean, eraikiko duguna. Eredu aldaketa horren erdigunea herritarra da, pertsona, gipuzkoarra".
"Erakunde honetatik hasita, lurralde garapeneko politikek Aldundi osoa hartu behar dute bere baitan", adierazi du, eta Aldundia horretan ari dela gaineratu "legealdi hasieratik eta arloz arlo aldaketa horri begira hainbat eta hainbat erabaki hartuz".
Beste urrats bat
Ikuspegi integral horri begira emandako beste urrats bat da eman berri dutena, Aldunditik jakinarazi dutenez: Lurralde Garapenerako Zeharkako Zuzendaritza sortu berri dute.
Lurralde garapena bultzatzeko departamentu guztiek lan egiten dute eta departamentuetatik egiten den lan hori guztia koordinatzeko eta bideratzeko helburuarekin sortu dute zeharkako zuzendaritza: "Aldundi osoak norabide horretan kokatu eta egiten dugun hori indarberritzeko eta lurralde osoan eragiteko helburuarekin, tokian toki egunero egiten den garapena indartzeko".
"Alor honetan ibilbide luzea du Iturbek"
Horretarako, gainera, maila lokalean esperientzia duen zuzendaria jarri dutela azpimarratu dute foru ordezkariek: Pedro Iturbe, Antzuolako alkate izandakoa eta "alor honetan ibilbide luze duela", euren esanetan.
Lurralde garapenerako ildoaren lerroak datozen asteetan azalduko dituzte zehatzago, baina bi aspektu azpimarratu dituzte: Tokia eta Sarea: "Aberatsak dira oso gure Gipuzkoa honetan tokian toki ematen ari diren garapenerako ekimenak. Tokian toki gertatzen denaz eta sustatu nahi denaz jabetu behar dugu eta denak elkarrekin egoera hau iraultzeko oinarri sendoak jarri. Eta nola ez Sarea. Gipuzkoa berria eraikitzeko Gipuzkoak Sarean funtzionatu behar du".