Gazte Asanbladakoek azaldu dute hobeto komunikatzeko ahaleginetan bide berriak sortzen dabiltzala, eta webgune berria bide horretan beste pauso bat izan dela. "Orain arte Twitter,Facebook eta Mail zerbitzua erabili izan dugu; baina konturatu gara sare sozialetan ez dagoen jendearengana ez garela heltzen eta, gainera, e-mail bidez informazioa zabaltzeko helbidea eskatu beharra dagoela. Horregatik, edonori zabalik egongo den gune bat eraikitzea erabaki dugu", gaineratu dute Gazte Asanbladako kideek.
Webgunea bost ataletan banatuta dago: Albisteak, Gaztetxia, Multimedia, Kontaktua eta Harpidetu. Albisteak atalean, ekitaldien informazioa jarri dute; eta Gaztetxia-n, Asanblada nola dagoen egituratuta azaldu dute.
Informazioa jasotzeko aukera
Kontaktua atalean, gaztetxearekin harremanetan jartzeko aukera dago; eta Harpidetu atalean, asteroko egitarauaren mail informatiboa jasotzekoa. Horretarako, izena eman behar da. Multimedia atalean, argazkiak eta bideoak igo dituzte; bide batez, gaztetxeko argazkiak izan ditzaketenei dei egin diete eurekin harremanetan jartzeko.