Aurten, zergek KPI-aren igoera izango dute, %2,8. Ima Begiristain alkateak azpimarratu du, gastuak igo egin direla zergak eta BEZ-a ere igo egin direlako.
Gastuei dagokienez, esan, pertsonal gastuendako 703.610 euro bideratuko direla eta ondasun arruntak erosteko 873.626 euro. Ondasun arrunten barruan, argiteria, udaleko ekipamendua eta material informatikoak daude, besteak beste. "Aurten udaletxean ordenagailuak jarri nahi ditugu", azaldu nahi izan du Ima Beristainek.
Egiteko diren lanak
Aurtengo egitasmoen artean, eskola handitzea –aurrefabrikatutako behin behineko moduluekin–, irisgarritasun plana –150.000 euroko diru partida– bideratzea, hau da herriko trabak eta espaloiak berdintzean, baserriko ur-sarea handitzea, San Joseko pareta konpontzea edota Armarria aldatzeko azken fasea gauzatzea daude, beste askoren artean.
Lanean dihardute ere autobusa herritik kanporatzeko –140.000 euroko partida– eta biomasa proiektua –50.000 euroko partida– aurrera ateratzeko. Azken honek, propanoari alternatiba bilatu gura dio eta faktura erdira jaitsi. Horretarako, Hirigintzak 746 mila euro ditu.
Parte-hartze prozesuak ere eman ditu fruituak eta herritarrek eskatutakoari ere eman gura izan dio erantzuna Udalak. Horren eredua da esaterako, gazteendako skate parkea egitea. Horretarako 15.000 euro bideratuko ditu Udalak. "Oraindik aztertzen ari gara; izan ere, zarata ekidin nahi dugu eta leku egokia bilatu behar zaio skate parkeari", gaineratu du alkateak.
Parte-hartze prozesua
Parte-hartze prozesua, herritarren eta Udalaren arteko zubia eraikitzeko beharrezkoa dela azaldu dute. "Aurrekontuak egiterako orduan oso aberasgarria eta lagungarria izan da burututako parte-hartze prozesua. Ohartzen ez ginen gauza askori erantzuteko balio izan digu-eta", azaldu du Udalak aurkezpenean.
Gai askorekin bat etorri dira herritarrak eta Udala: eskola handitzea, herriko kultura eta sortzaileak bultzatzea, trafikoa egokitzeko plana burutzeaz, bidegorria egiteaz, irisgarritasun planaz, energia aurrezteko planarekin, kiroldegiko txartel mankomunatua aurrera ateratzeaz...
Aurrekontu proposamena, datorren osoko bilkuran onartuko du Udalak.