Txosten geologikoa
Behin geologia enpresak txosten geologikoa eginda, aurrekontua ere egin du. Lanak bi fasetan egin behar direla ikusi dute. Orain behin betiko lana zein izango den erabakitzen dihardu Udalak. Bi fasetan egin beharreko lana da: lehenengo lana urgentziazko egonkortze lana eginda dago, errepidea zabaltzekoa alegia. Sasiak kendu dira eta hormigoia –gunitatua– proiektatu da.
"Errepidea zabalik dago eta hilabete batzuetarako segurtasuna bermatuta dago", azaldu digu Valen Monuxek, Hirigintza teknikariak. "Baina ez da behin betiko irtenbidea. Hiru aukera ditugu irtenbide gisa baina ondo aztertu behar ditugu. Ondo baloratu behar da soluzioa, obra handia da eta gainera prezio ona lortu nahi dugu". Behin betiko lanak egiteko, esan modan, hiru aukera daude: lehena, harri tontorrak kentzea edo, jauzi araztea; bigarrena da harri horiek sare batzuen bidez eustea. Eta hirugarren posibilitatea litzateke hormigoi gunitatu kapa handiagoa botatzea. "Alternatiba denak garestiak dira, denbora behar dugu teknika onak aztertzeko eta prezio ona aukeratzeko", gaineratu digu Monuxek.
Auzolana ingurua txukuntzeko
Zapatuan, 09:00etan, San Josepe ingurua auzolanean txukuntzeko deia egin du Udalak. Izan ere, Olentzero San Josepe bidetik pasatzen da ume eta ume ez direnei opariak eta ikatza banatzeko. Urtero sekulako harrera egiten zaio. Horregatik, Olentzerori bidea garbitzeko asmoz, auzolanerako deialdia egin die Udalak herritarrei.