Nagusiak ere aho zabalik
Ipuin kontalariak umeekin erlazionatzen ditugu gehienetan, baina Antzuolan argi geratu da nagusiak ere aho zabalik utzi eta istorio eta abentura izugarrietan murgiltzeko magia eta ahalmena badutela ipuinek. Zapatu gauean, esaterako, ipuin erotikoen kontaketa egin zuten Torresoroan.
Ipuinen maratoi honetan gainera, hitz biluzi baina berezi horiek goi mailako kontalarien ahotatik entzun ahal izan dira. Herriko puntu eta kale ezberdinetan banatuta hamasei ipuin kontalarik jardun dute kontu kontari Antzuolan asteburuan: Marisol Abreu, Begoña Alabazan, Pello Añorga, Virginia Imaz, Amaia Arriaran...
Orakulua eta kontsultorioa
Domekan han eta hemen entzun zitezkeen istorio zirraragarriak. Zurrategi plazako kioskoa neska-mutikoz beteta zegoen, guztiak begiak zabal-zabalik eta kontalariaren abenturak jarraitzen. Kalebarrenen berriz, kontsultorioa ipini zuen Pello Añorgak irudimena eta sormena lantzeko eta orakulua ere topatu zitekeen kale berdinean. Eguerdiko txikiteoa ere ipuin-poteo bilakatu zen domekan, kontalariak kalez kale eta tabernaz taberna ibili ziren. Egun osoko egitaraua arratsaldeko ipuin maratoiak itxi zuek.
Aurtengoz bukatu da hitzaren maratoia. Hala bazan, ez bazan, sar dadila kalabazan eta atera dadila, datorren urtean, Euskal Herriko beste plaza batean.