Eguraldia aldeko, zapatuan meza entzun eta mokadutxoa egin zuten ostean, ardo eta gaztarekin. Plater tiroketa txapelketa izan ohi da zapatuko izarra eta aurten ere ez du hutsik egin. Txapelduna Vicente Rajado izan zen, berdinketa hautsita Luis Manuel Altube Txanbolin eta Jose Luis Arregiren aurka; hirurek 15 plateretik 14 txikitu zituzten.
Iluntzean herri afaria egin zuten 80 bat lagunekin eta osteko erromeria Olarte eta Elortzak alaitu zuten. Gaua suzko errubera ikusgarriek borobildu zuten.
Domekan, dantzak
Eguraldi motela izan arren, domekan jende asko joan zen ermitara herriko abesbatzak lagundutako meza entzutera. Luntxa izan zuten, ohi bezala, eta ostean Antzuolako Oinarin dantza taldeak saioa egin zuen. Erromeriarik ere ez zen falta izan atzo arratsaldean eta, horretaz, Miren, Allur eta Maiztegi hirukotea arduratu zen.