30 urte pasatu dira Tomas Madinabeitia apaiza Kongoko Kansenya lurraldean hainbat proiektutan lanean hasi zenetik. Umeen eskolaratzea zen orduan helburua; bereziki eskolak materialez hornitu eta maisuen soldatekin laguntzea.
Gero batu zitzaizkien proiektura Andres eta Bittor Arbulu antzuolarrak; euren lana, Tomas Madinabeitiarekin eta Agustin Lazarobasterrekin batera Kansenya herrira lehenengo eta Kapirira gero, ura eramatea zen. Gaur egun bai Kansenyan eta baita Kapirin ere, bosna iturri daude eta azken honetan, erdigunean, baita garbitokia ere. Kapiriko proiektua irailean bertan amaitu zuten, Anelkarrek eta beste elkarte batzuek egindako ekarpenari esker, hein haundi baten.
Arbuluk, Larazobasterrek eta Madinabeitiak, baina, ez dituzte hemen bukatuko Kongoko Kansenya lurraldeko proiektuak; orain, Kapiritik 7 kilometrotara dagoen Mutobo herrira ura eramatea da asmoa. Baita Kansenyako ospitalera ura ganoraz eta garbi iritsi dadin ere beste proiektu bat hastea.
Egindako proiektuen eta etorkizunekoen berri emateko berbaldia egingo dute bihar Madinabeitiak eta Arbuluk, 18:30ean, Olaran etxean.