Helena Tabernak zuzendu du lana, eta Nagore Laffage gaztearen hilketa du ardatz nagusi. Jose Diego Yllanesek hil zuen Laffage 2008ko sanferminetan. Filmean parte hartzeaz gain, kontakizunaren hari nagusia ere bere gain hartu du Asun Casasolak, Nagoreren amak. Biktimaren familiako kideen eta lagunen testigantzak jasotzeaz gain, lanak prozesu judizialean inplikatutako hainbat kideren ikuspegia ere plazaratzen du: fiskalarena, alde bietako abokatuena eta genero indarkeriaren kontrako kolektiboetako ordezkariena, besteak beste. Horrez gain, pelikulak artxibo-materiala ere biltzen du, krimenaren berritzearen irudiak eta epaiketaren hainbat atal.
Film dokumentalak zenbait aitorpen eta sari jaso ditu jaialdietan. Azkena azaroan jaso du, Vigon (Galizia), genero indarkeriaren kontra egindako lanarengatik.
Elkarretaratzea
Azaroaren 25ean, egubakoitza, emakumeen aurkako indarkeria salatzeko elkarretaratzea egingo da Herriko Plazan, 18:30ean. Antzuolako Udalak antolatu ditu bi ekintzok.