Antzuolako dantzariez gain, Oñatiko Oñatz taldekoek, Arrasateko Lore Gazteak eta Txikitxu taldeetakoek, Soraluzeko Urrats taldekoek eta Legazpiko Korosti dantza taldekoek parte hartuko dute domekako dantzari egunean.
Bi dantza-saio plazan
Domekan, goizeko 10:30ean etorriko dira dantzari guztiak eta goizean kalez kale dantzak egingo dituzte lehenengo. Ondoren, 12:30ean, talde guztiak herriko plazan elkartuko dira eta guztiek batera egingo dituzte dantzak.
Neskek esku dantza, arku dantza eta makil dantza egingo dituzte; mutilek banakoa, brokel dantza eta txankarrankoa; eta, bukatzeko, neska-mutilek batera gorulari, fandangoa eta arin-arin dantzatuko dituzte. 13:30ean etxeetara bazkaltzera joateko banatuko dituzte haurrak. Etxeetan ez ezik, gaztetxean ere bazkalduko dute ume batzuek. Izan ere, 25 bat dantzarirendako lekua izango dute han.
Arratsaldeko saioa 17:30ean hasiko da. Talde bakoitzak dantza berezi bana egingo du plazan. Antzuolakoek, adibidez, trokeo dantza bat eta eusko dantza egingo dituzte. Arratsaldeko saioa bukatzeko guztiek batera egingo dituzte makil-txiki, txantxoak, zazpi jauzi eta txapeloaz dantzak.
Oinarin dantza taldeko neska gazteak entseatzen harrapatu genituen joan den astelehenean Torresoroan. Irakasleen arabera entseguetan ez dira oso serio aritzen baina gero plazan ondo ateratzen zaizkie dantzak. Ea, bada, nola irteten zaien domekako dantza-saioa.