Afaldu ostean Virginia Imazen Divinas ikuskizuna egongo da Torresoroan, 22:30ean. Sarrera 8 euro kostako da eta aurrez erosi ahal izango dira Itzar liburu dendan. Antzezlana ikustera joaten diren guztien artean zozketatuko dute bidezko merkataritzako produktuez osatutako saski bat.
Virginia Imazek aspaldi esana zien Anelkarreko kideei prest legokeela antzezlan bat egiteko antolatzen zuten jaialdiren baten. Hala, Anelkarrekoek Imazek esana aintzat hartu eta opor osterako antolatu dute jaialdia, Jabi Etxanizen esanetan, "oporren ostean indarrak hartzeko" .
Batzen den dirua, Kongorako
Irailaren 2an bertan Kongora abiatuko da Bittor Arbulu antzuolarra, han martxan duten proiektu batean parte hartzeko: errekako presa batetik herrira ura bideratzea da proiektuaren xedea. Irailaren 2ko afarian eta antzerkian batzen den dirua Kongoko proiektu horretara bideratuko da.