Urretxu eta Bergara arteko errepidea konponduko dute

Urretxun hasi eta Bergararainoko GI-632 errepidearen zatia konponduko dute maiatzean. Oso egoera kaskarrean dago, batez ere, azkeneko elurtearen ondorioz.

Aurreko astean zulo handienak estaltzen jardun zuten Diputazioko langileek. Maiatzean, baina, guztiz konponduko dute errepidea. Horixe jakinarazi digute Diputazioko langileek.

Azkenaldian oso egoera txarrean dago errepidea, bereziki, azkeneko elurtearen ondorioz. Gainera, kontuan hartu behar dugu zirkulazio pisutsudun errepidea dela.

Lanak, hiru fasetan

Hiru zatitan banatu dituzte lanak: lehendabizi, Urretxu eta Deskarga arteko errepide zatia konponduko dute; ondoren, Deskarga gainetik Antzuolara artekoa eta azkenik, Antzuola eta Bergara artekoa. Maiatz hasieran hasiko dituzte lanak. Azkeneko zati honetako lanak gauez egingo dituzte, zirkulazioari ahalik eta arazo gutxien sortarazteagatik.

Eguraldiak jarriko du lanen erritmoa, baina espero dute maiatzean bukatzea lan guztiak.

Mendebaldeko sarrera egiten hastear

Diputazioko arduradunek esan digutenez, aste batzuk barru hasiko dituzte herrirako sarrera berriaren bidegurutzea egiteko lanak. Aurreko asteko egubakoitzean argitaratu zuten Gipuzkoako Aldizkari Ofizialean lan horien esleipena onartu duela Diputazioak. Construcciones Galdiano enpresak egingo ditu lanok eta aurrekontua da 970.457 euro.

Bidegurutzea eta zubiak

Helburua da gaur egungo sarrera desagertaraztea, oso arriskutsua da eta. Hortaz, Bergara aldetik datozen ibilgailuek Uzarragarako zubitik sartu beharko dute herrigunera. Zubi horretan ere egin beharko dituzte lanak, zabalagoa egiteko. Bestalde, Kalebarrengo zubia ere egokituko dute trafiko handia izango du eta sarrera berria egiten dutenean.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.