Hortaz, arazoaren konponbidea eskolako patioa estaltzea izanik, kirolguneetan esperientzia teknikoa duen Alvaro Perez de Amezaga arkitektoari eskatu diote proiektua egitea; hura arduratu zen Eztalako zelai berriaz ere.
Proiektuaren arabera, lursaila bost metro eta erdi handituko litzateke eskolako itxitura ondoko berdegunea eta espaloia aprobetxatuz. Hortaz, azalera erabilgarria 1.323,90 metro koadro izango da eta estalkiarena 1.537,68 metro koadro.
Ezaugarriak
Egiturak hormigoizko eta metalezko arkupea izango du oinarrian eta kolatutako egur laminatua estalkian. Estalkia metalezko zazpi zutabe bikoitzek eta hormigoizko beste zazpik eutsiko dute eta aluminio kapa, isolamendu kapa eta izei tarima izango ditu. Jolastokiaren parametro bertikalak itxita egongo dira pistaren perimetroan kantxaren mailatik hiru metroko altuera libre utziz. Gainera, hormigoizko lau harmaila ipiniko dituzte 185 lagunendako.