Udalak babestutako 20 etxebizitza egiten dihardute Eguzki eta Beheko auzoen artean, maristen eraikina zegoen tokian. Etxebizitza horien jabeendako garajeak izango dira plaza gorriaren azpiko aldean hutsik dauden 20 garaje. Ez ditu inork erabiltzen garajeok; gauzak horrela, Udalak erabaki du, Antzuolako Udal Etxegintzaren bitartez, garajeak oraintxe ematea etxebizitzen jabeak izango direnei.
82 urterako kontzesioa
Orain dela 17 urte egin zituzten plaza gorriaren azpiko aldeko garajeak. Lursailak Udalarenak ziren eta gune horretan garajeak egiteko lehiaketa deitu zuen. Sarkis enpresak irabazi zuen lehiaketa hori eta berak kudeatu du garaje horien erabilpena. 99 urterako kontzesioa izan zen hura. Orain, Udalak babestutako etxebizitzen jabeei egingo zaie kontzesioa, 82 urterako, 17 urte pasatu dira eta.
Horrelaxe azaldu du erabakia Pedro Iturbe alkateak: "Etxebizitzen jabeek ekainera arte ez dituzte izango giltzak. Bitartean, baina, garajeak hortxe daude, hutsik, inork ez ditu erabiltzen eta ikusi dugu egokiena dela oraintxe ematea garajeok". Bizpahiru aste barru jasoko dituzte garajeetako giltzak.