Hezetasun arazoak zituen pilotalekuak eta hori konpondu asmoz drainatze lanak egin zituzten, baita argiteria berria ipini ere. Obrak amaituta, ordea, ohartu ziren pinturarekin arazoak zeudela, hortaz, berriz margotu behar izan dituzte frontisa eta ezker pareta.
Ezker paretean berniza
Udal aparejadore Valen Moñuxek azaldu digunez, "frontiseko pinturak ez zeukan kalitate nahikorik, hortaz, dena kendu egin zuten eta pintura gogorragoarekin berriz margotu". Lan horiek egiteko astebete inguru behar izan zuten langileek.
Bestalde, frontoiko ezker paretean pintura nahikoa izan arren tindagai gehiegi zeukala esan digu Valen Moñuxek eta pilotak zikindu egiten zirela horma jota. "Tindagaiaren arazo hori konpontzeko ezker paretari pintura berdearen gainetik berniz berezia eman diote".
Kontratistak kostua bere gain
Frontoia berritzeko lanek 30.000 euroko kostua izan zuten eta pinturaren akatsak konpontzeko egin beharreko lanak bere gain hartu ditu kontratistak, Construcciones Perak. Hortaz, Udalak ez du aurreko kostuaz gain, diru gehiago ipini beharrik izan.