Toribio Jauregik 40ko hamarkadan ateratako argazkiak dira; zuri beltzean eta mugimendurik gabekoak, garaiko kamerek ateratzen zuten modukoak. Bilboko Euskal Museoan, pilotari buruzko erakusketaren osagarri dira Jauregiren lanak.
Argazkiekiko zaletasuna
Toribio Jauregi 1896an jaio zen, Antzuolako Antzeta baserrian. Ez zen argazkilari profesionala baina erretratuak ateratzea gustoko zuen. Hala, Bergarako Barrenkalen zeukan drogerian atondu zuen argazki estudioa eta laborategia . Herrian gertatzen zen guztiaren partaide zen. Horri esker, ez zen ezer geratzen haren objektiboak harrapatu gabe. Baina gehienbat pilotari buruzko argazkiak egin zituen. 30 urte baino gehiagoko lanaren emaitza da. 1936an hasi eta 1969a bitarte aritu zen. Egun, Bergarako Udal Artxiboaren esku daude.