Eguenean, 14:30ean hiru lagun herriko supermerkatu baten inguruan zeudela jakinarazi zion ertzaintzari herritar batek. Patruila bat tokira joan eta hiru lagun ikusi zituen supermerkatuaren atzeko aldean. Euren jarrerak agenteen susmo txarra piztu zuen eta ertzainak ikustean, lagunetako batek latexezko eskularru bat bota zuen.
Hiru susmagarriak identifikatu zituzten eta saltokiaren kanpoaldea miatu zuten ertzainek, leiho bat indarrez ireki zutela egiaztatuz. Inguruan ahuntz-hanka bat aurkitu zuten eta susmagarrietako batek leihotik erauzitako margo zatiak zituela egiaztatu ondoren, hiru lagunak atxilotu zituzten.
I.D.S. (22 urtekoa), A.L. (23 urtekoa) eta G.C. (26 urtekoa) Bergarako ertzainen egoitzara eraman zituzten, beharrezko eginbideak bukatutakoan epailearen esku uzteko.